Ma do heyfê embazanê xo bigirî

9ê Çileyê 2013î de paytextê Fransa Parîsî de 2 cinîyî şorişgêrî Sakîne Cansize, Fîdan Dogane û Leyla Şaylemeze ameybî qetilkerdiş û emser serrgêra 5. yê qetilkerdişê înan o. Babete ser o Koordînasyonê KJKyî û Tevgerê Cinîyanê Azadan (TJA) îzehetê nuştekî dayî. 

Koordînasyonê KJKyî îzehetê xo de wina va: “Ma kewenî serra 6. ya qetilbîyayîşê embazanê xo. Embazê ma vernîya çimanê dinya de bi planê AKP û MÎTî paytextê Fransa Parîsî de ameyî qetilkerdiş. Ma vernîya vîrardişanê înan de bi rêzdarî vileyê xo çewt kenî û ma sozê pêardişê xeyalanê înan danî. Reyna ma do vera hêzanê tarîyan ke nê qetlîyamî plan kerdî de têkoşînê xo xurt bikerî û heyfê embazanê xo bigîrî. Ma do sey Tevgerê Azadîya Cinîyan serra 40. ya PKKyî de na komploye roşn bikerî û xoverdayîşê xo gird bikerî.”

Koordînasyonî dewamê îzehetê xo de vato ‘Qetlîyamê Parîsî raşteraşt bi talîmatê Erdoganî û bi organîzekerdişê MÎTî virazîyayo’ û wina dewam kerdo: “Netîceyê îfadeyê endamê MÎTî de û belgeyanê bînan de no bi hawayo aşkere vejîyayo orte. No hedîse de rîyê raştikên yê dewleta faşîste yewna rey vejîyayo orte. Tevgerê ma qet çîyê ke vera embaz, cinî û şarê ma de bêrî kerdiş xo vîra nêkeno. Ma tepiştişê endamanê MÎTî de zî na raştîye dî. Her hêrişo ke aşkere beno, têkoşînê ma hîna zaf nizdîyê serkewtişî keno. Ma sey KJKyî veng danî cinî, hetgiranê demokrasî, rêxistinanê cinîyan, huqûqnas û şorişgêran ke wa sere de AKP, Erdogan, MÎT û heme hêzê ke Qetlîyamê Parîsî de ca girewtî ra hesab bipersî. Sondê ma o yo ke ma têkoşînê Embaze Saraye biresnî serkewtişî. Ma do hesabê nê qetlîyamî bi bîyayîşê Sara, Sêvê, Delale, Berçeme û Gulnaze bipersî.”

Înan waştişê azadîye musna ma 

TJAye zî îzehetê xo de va ‘qetlîyamê cinîyan çîyêko tesadufî nîyo’ û wina dewam kerdo: “Emser serrgêra 5. ya qetilbîyayîşê Sakîne Cansize, Fîdan Dogane û Leyla Şaylemeze, serrgêra 2. ya qetilbîyayîşê Sêvê Demîre, Fatma Uyare û Pakîze Nayire yo. Sakîne Cansize Kurdistan de cinîyanê nimûneyan ra ya. Cok ra Rayberîya ma seba aye vatbî ‘cuya Sakîneye nimûne ya, azadbîyayîşê cinîye têkoşînê Sakîne yo’. Sêvê, Fatma û Pakîze zî serrgêra qetlîyamê Parîsî de ameyî qetilkerdiş û no çîyêko tesadufî nîyo, bitaybetî ameyo plankerdiş. Nê embazanê ma waştişê azadîye musnayî bi ma. Cesaret, hêvî û bawerîya înan ma rê mîras mendî û têkoşînê înan resnayîşê serkewtişî zî deynê vileyê ma yo.”

Ma do zorê faşîzmê bîşêrî

TJAye peynîya îzehetê xo de wina va: “Ma do vera qatilanê Parîs û Silopîye de keye bi keye xo rêxistine bikerî, zanayîşê xo aver bîşêrî û çalakîyanê xo gird bikerî. Ma do na çarçewa de 5 û 9ê çileyî sey vera qetilbîyayîşê cinîyanê polîtîkan de hewteyê xurtkerdişê têkoşînî bigîrî dest. Ma sozê qedênayîşê sîstemê dagîrkerîye danî. Ma veng danî rêxistinê Kurdistan û Tirkîya ke wa wayîrê nê embazanê şorişgêran bivejyî. Ma do bi hêzê yewbîyaye yê cinîyan zorê faşîzmî bîşêrî.” 

Polıtıka