Lütfen bekleyin.. Lütfen bekleyin..
Festîvala 17. ya Xoza û Kulturî ya Mûnzûrî ke serra 2000î ra na het virazîyena, emserr amê plankerdiş ke mavêna 27-30’ê Temmuze de bîro viraştiş, bi fermanê walitîyê sûk amê qedexekerdiş. Partîyanê sîyasî, temsîlkaranê sazîyanê civaka sivîl û hunermendan qedexeyê walitî nêsilasna û roja sifte yê festîvale de bi îzahatekê ortex polîtîkayanê qedexekerdişî rê nêrazîbîyayîş damûsna. Îzahatî ra dima Meydanê Seyîd Riza de şolena muzîkî virazîya.
Temsîlkaranê Partîya Demokratîk yê Şaran (HDP), Partîya Emegî (EMEP), Partîya Sosyalîstanê Bindest (ESP), Federasyonê Demokratîk yê Şaran (DHF), Federesyonê Komeleyê Dersim (DEDEF), Komeleyê Demokratîk yê Elewî (DAD), Konfederasyonê Sendîkayanê Emegdaranê Raya Pêroyî (KESK) û Komeleya Çorme yê Mûnzûrî roja sifte yê Festîvala Xoza û Kulturî ya Mûnzûrî ke hetê walitî amê qedexekerdiş de îzahatêko ortex day çapemenî û qedexekerdişê festîvalî rê nêrazîbîyayîş damûsnay. Îzahato ke Meydanê Seyîd Riza de ame dayen, welatijan ra pîya, hunermendê namedar Mîkaîl Aslan, Ferhat Tûnç, Erdogan Emîr û Grube Mûnzûr kî tewr bî.
Qedexeyê festîval û yê ziwanê kurdî eynî yo
Ser nameyê komî Alî Riza Bîlîrî îzahat wend û vist vîrî ke însanê Dersim 16 serrî yo ke bi tamê şolen de festîvala xo virazeno. Bîlîrî bi wesîleyê roja verên yê Festîvala Xoza û Kulturî ya Mûnzûrî ke însanan resnena pê û resnena xoza şarê Dersim selamî kerd. Bîlîrî vist vîrî ke zilmê rewşa îstîsnayî ke zey hewnê sîya gina ser weşîya bi mîlyonan kesan ro, do nêreso serkewtişî û aşkere kerd ke sebebê qedexekerdişê festîvalî ke dewlet giroto û sebebê qedexekerdişê ziwanê kurdî eynî yo.
‘Festîval vîra ageyrayîşê dewê ke amey veşnayîş a’
Alî Riza Bîlîrî vist vîrî ke Festîvala Xoza û Kulturî ya Mûnzûrî dûştê qilêrinbîyayîşî de pakîye temsîl kena û wina va: “Festîval vîra ageyrayîşê dewê ke amey veşnayîş a. Vera birrê ke amey veşnayîşî de hêrs a. Vera bendawê ke vernîya awê muqadesî de virazîyenê rê vervetiş o. Tewr peynî de Bîlîrî bi omidê pêhet ameyîşê festîvalanê bê OHAL, bê qeyûm, têduşt, demokratîk û serbest şarî selamî kerd. Qiseyanê Bîlîrî ra dima şêligî sloganê “Festîval yê şarî ya, do yê şarî bimano” berz kerdî.
‘Ganî her ca de xoverdayîşê topyekun bibo’
Parlementerê HDP yê Dersim Alîcan Onluyî zî vera zulmê topyekun yê îqtîdar hayr ant xoverdayîşê topyekun yê şarî ser. Parlementerê HDP yê Stenbolî Erdal Ataşî zî aşkere kerd ke do netîceyê têkoşînê ortex de zîhnîyetê qedexe biwelişyo.
Îzahatî ra dima Endamanê Koma Mûnzûre Meydanê Seyîd Riza de şolena muzîkî da Dersimijan.
DÎHABER/DERSIM
