Lütfen bekleyin.. Lütfen bekleyin..
7ê teşrîna peyêne ya 2016 de dewlete bi hêrişê hewayî Newala Çetî yê Dersim de bombardiman kerdbî û netîceyê hêrişî de 11 DHK-Cyî merdbî. Nînan ra cenazeyê 10 kesan hona zî nêdîyayo keyeyanê înan. Pîyê Murat Gunî, Kemal Gunî seba ke cenazeyê lajê xo yê Muratî bigiro, 46 rojî yo ke Meydanê Seyîd Rizayî de grevê vêşanî dayo destpêkerdiş. Babete ser o Pawitoxanê Buroyê Huqûqî ra Ayşegul Çagataye û pî Kemal Gunî qisey kerdî.
Çagataye vist vîrî ke ‘o wext 7 cenazeyan berdbî Edlî Tibî yê Malatya, labelê nê cenazeyî nêameyênê naskerdiş’ û va: “Seba ke cenazeyî bi hawayo 7 parçe yenî û aydê 5 kesanê cîya-cîyayan î û seba ke ameyî veşnayîş û parçekerdiş nînî naskerdiş. Ti kesî ra nêvanî û cenazeyê 5 kesan goristananê bêkesan de defin kenî. Badê ke Gunî dest bi grev kerd, avûkat û keyeyî cayê hedîseyî de kifş kerdî, ma musayî ke 165 parçeyê esteyan ameyo dîyayîş.”
Tena qismêk sereyê ci sexlem mendbî
Çagataye dewamê qiseykerdişê xo de va ‘her çiqas ke ma waştişname zî da, heta nika ti netîce nêvejîyayo’ û wina dewam kerde: “Ewja de bombeyêka senîn ameya xebetnayîş. Wina aseno ke sîlehî daxî helîyayî. Cenazeyo ke seba Bunyamîn Kiliçî ame dayîş zî, cenazeyêko temam nêbî. Tena qismêk sereyê ci sexlem mendbî. Wina yeno famkerdiş ke bi temamî ameyo veşnayîş û hewl dayî ke bi temamî îmha bikerî. Ma do heta ke cenazeyanê xo bigirî, tîya de çalakîya xo bidomnî.”
Ez do xover bida
Pî Kemal Gunî zî va ‘heta ke cenazeyê lajê mi teslîmê mi bêro kerdiş, ez do xoverdayîşê xo bidomna’ û wina domna: “Heqê definbîyayîşê yê cenazeyê mi zî esto û ez bizanba ez do bimira zî, ez têkoşînê do xo bidomna. Ez wazena ke wa mezelêk yê lajê mi bibo. Seba her roja mi ya tîya 227 TL ceza dîyayo mi, her çiqas ke ê zanî ke ez tîya de ya zî, ceza erşawitî Erzînganî. Wina kenî ke hewl danî merdimanê ê cayan vera mi de sûr bikerî.”
DÎHABER/DÊRSIM
