Lütfen bekleyin..
Munzur Haber / VERBA ZILMÊ WURZE PAY / *HASAN ALİ KILIÇ

VERBA ZILMÊ WURZE PAY / *HASAN ALİ KILIÇ

05 Mart 2017, 13:30

'Tarixê Dîna zulmê zulimkaru ra piro. Oncî qarşîye na zulmu de kî payvindena soreşgeru u mazlumu esta. Tarix herkeşî eve kêrdenunê xo nusneno. Zulimkarî eve zulmê xo dekerîne, mazlumî u şoreşgerî kî; qarşîye na zulmu de çutur payvinetê, ceng kerdo, teslîm nê bîye eve nînu dekerînê.'

Ewro her cayê welatî kerbelawo, Dersîmo, Qoçgîrî’yo, Zîlano. Mereşo, Şevazo, Çorumo. Eve mordîs nê qedîne ke. Roboskîyo, Suruço, Anqara wo. Her vizeye welatî de ewro gonî polekîya. Eve bombe u tank u topu qirkerdîs nîyo ru. Zerê welatî de, Ververoza Hortîye de. Roze çîna ke Bombeyî me peqê, qirkerdîs me bo, zere estene kar ra vetene me vajîyo.

Sodir Sonde Toximê Dismenenî Ramîno

Ewro kêrdenê ke welatê ma de ardê sarê ma serde eve nustayis nê qedînê. Peroz u pesewe eve na kerdenu weşîya ma vîyerena. Sodir çimunê xo keme ya kistena, qirkerdayiso, zere estena, kar ra vetena. Sonde kume ra hona yî xeverê... Kokê sima ame, mîslîyenî ra sima kiseme, xelesa sima çîna!.. Eve na vatenu dismenenî ramîna. Haştenî birayenî kerda tomete. Eve dismenenî dormê xo kenê hîra. Eve zor, eve ters eve kar ra vetene, eve vêsanenî wazene ke her keşî teslîm bice rê. Vanê ya mara wa, ya kî dismenê ma wa. Kam ke teslîm nê bî kî her dismenenî anê sarî serde. Bê pers, bê huquq u bê adalet ju reye de eve des hazaru yîsonî kar ra vezenê.

Na Hardu Xeyle Pasay Xeyle Sultanî Dî

Xeyle Pasay xeyle Sultanî xeyle zulumkarî amey vîyerdî ra şî. Juye de xo eve rindîye nê dekerîya. Eke taxt ra gina ware vîra homete ra kî gineno ware. Teyna zulmê yî vîra saru de maneno. Na nêjdî de yîye ke yenê ma vîr yînu ra Nîhat Erîm eve îdamê Denîz Gezmîş, Yusuf Aslan, Hüseyîn İnanî vîra ma de mendo. Eve kistene eve xiravinenî eve zorbajenî dekerîno. Hama Denîz, Yusuf, İnan u Mahîr Çayan, İbrahîm Kaypakaya vîra însanîyetenî ra qe nê vejînê. Eve rindîye, eve haştîye, eve birayenî u şoreşgerenî dekerînê.

Taxtê Kenan Evrenî ke nê rijay vî, herkeşî tey guretenê ra. Vatena yî ra nê vejîyenê. Halbike yî kî xeyle gonîya saru u cencu çarç kerdîvî. İdamê Xidir Aslanî u Erdal Erenî hona je ewreyenî her keşî vîr de ro. Neçe cencî eştî darde, neçe cencî zere de poynay. Dima ke taxtê xo rijîya, kes lewe de nê mend, keşî vîr de eve rindîye nê dekerîno. Eve zulumkarîyenî ma saru u şoreşgeru vîr de mend.

Ne Wusara 12’ yîne 1971 de, Ne kî 12’ya Payiza Virene 1980 de Honde Zulim Bî

Ewro tafu dumanê na rozu kerdo ra Nîhat Erîmî u Kenan Evrenî serde. Ne yasa nas kenê ne adalet.

Her çî binê lingu de ro. Ne meclîs ne weçîntayis ne kî demoqrasî... Weçîntayîsê sarê Kirmancî horte ra dard we. Serokê Şaredarîya sukunê Kirmancu serokenî ra guretî butu pîya eştî zîndanu. Ne Gülten Kişanak’e, ne Ahmet Türk ne kî Mehmet Alî Bul mend. Serokê HDP’yî Selahattîn Demîrtaş u Fîgen Yüksekdağ’e verê çimunê dîna de eştî zere, sîyaset ra day ware. Vekîle HDP’yî, serok u azaye HDP ‘yî bê huququ bê adaletî eştî hepisxanu, bîne partîya HDP’yî vesnay ters u xof horte de kerd girs, qazateyî, televîzyonî kerdî qapa. Nustoxî, akademîsyenî, malîmî, toxtorî, mendîjî, memurî eştî zere ya kî kar ra vetî. Kam ke teslîm nê bî mizê dîna ard sarî serde.

Nîyadane ke Eve Na Tore Keşî ra Veng Nê Vejîno, Nîkê Zulimî Tenena Jednene

Na kerdenunê AKP’yî herkes vîneno, qesey keno, nusneno hama kes meydanu nê vejîno. Ge ge ke taye vejînê meydanu yî kî senik manenê. Senik ke mendî kî eve uwa tazîkenî, eve qazê yîsotî, eve fîsegunê plastîku poleşî kenê axme. Her juyê xo nîseno rê caye, reyna kî nêşkînê bêrê tê are.

Qesa de wulu esta vanê: ‘’Na merdene ke merdena, na xire xire çika’’. Yîsonê je Selhattîn Demîrtaş’î, je Fîgen Yüksekdağ’e, je Gülten Qişanak’e, je Ahmet Türk’î, je İdrîs Baluken’î serokenî ra cenê erzenê zîndanu keşî ra piziye nê vejîna... Nu senê bê vengenîya? Wayîrê vîjdanî xeyle kes bî na welat de se bî nînu rê? Raye belîya meydanu ke nê vejayme veng ke nê vet, hona xeyle sarê ma daznenê hona xêyle zulum vîneme. Nîyade azayê konfederasyonê memuru KESK ra 14 hazar kes kar ra vetvî. Vejay meydanu, şîyayis virast kerd hayleme hurhut, dugelunê dîna ra quwetê waste, meclîs de suku de, bazaru de her cayê weşîye de na neqîye arde ra zu, nînu ra 12 hazarî peyser guretî kar. Azawunê KESK’ î ra 2077 kes mendo kar ra vetox. Serva yînu kî hona veng vezenê, hona meydanu de rê. Raye na rawa. Hama butu pîya, hama eve jedîyayene.

Verba Zılımî de Pê Reşîme Wurjîme ra Pay!

Vengê haqanîyetî birîyo, vengê zorbazu u zulumkaru her ca de bîyo berz. Ma gunê vengê xo zorbazu ra jede vejîme. Ewro yezît vîjerî ra jedîye, welatê ma çarno Kerbela. Qarşîye yezîdu de Hesen vîme, Wuşen vîme. Qarşîyê Osmanli de Şeh Bedrettîn, Börklüce Mustafa, Torlak Kemal’î çutur hetê miletê xo de qarşîyê zulimî vejîyê, ma kî ewro lê sarunê xo de Bedrettîn vîme, Börklüce vîme, Torlak vîme. Ewre roze a roza. Hinzir Pasay bîyê deyra. Qarşîyê Hinzir Pasawu de her juyê ma Pîr Sultan bo. Qarşîyê Avdila Pasay de her juyê ma Seyît Riza vo, Hesê Gewê vo, Civê Kejî vo. Xayînenîya Efendî u Rayverê Qopî de Zarîfa Xatunê u Alîşer’î çutur vineto gune ma kî na rozunê zulîm de henî vinderîme. Her çî ma dest de ro. Hewrê ters u xofî ke ma sanay pukeleke ver, mesteyê ma wu siro benê roştî.

(Dersim Gazetesi)

Bu haber 942 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Daimi Doğan nusna: “Dersîm de îtîqat be zon jûvînî ra pêrabestî yê. Vajîm..