Lütfen bekleyin.. Lütfen bekleyin..
Nûmayişa geyrayişê edalet yê Dayikê Şemî ke 589. qorî Stenbol de Meydanê Galatasaray de virazîya de mordemê vindîyan amey pêhet. Nûmayişo ke panqarta “kiştoxî aşkere yê vindî kotî de yê” bî ra de resîmê Rayverê DBP yê Şirnex Hûrşît Kulter ke 46 rojîyo vinîyo wedarîya. Nûmayişo ke bi persa ‘Hûrşît Kulter kotî de yo’ destpa kerd de aqibetê Ayten Ozturk ke verîya 24 serran Dersim de amê binçimkerden û bi îşkence amê qetilkerden persîya. Qeydê veng yê pawitoxê Ozturk Cîhan Soylemezî ame goştarîkerden.
Ozturk hetê ekîbê ‘Yeşîl’ amê remnayen
Nûmayişkaran ra Evrîm Baykand damûstayîna çapemenî wend û sanika Ayten Ozturk ard zon. Baykand vist vîrî ke Ayten Ozturk ke Mezgir de jew fabrîqayê Îdareyê Taybet yê sûk de gurîya 27ê Temûz 1992 de bi jû wesayîta sipî hetê 4 kesan amê remnayen û nîya behsê sanika Ozturk kerd: “8ê Tebax 1992 de Kartaltepe yê Karşiyaka yê Xarpêt de bi şiklê binerdkerdî amê vînayen. Jew destê ci teber de veradaye bi. Ayten rîwalê îşkence nêamê nasnayen (silasnayen), teşhîsê kamîya ci kincanê ci ra ame kerden.”
Bi îşkence înfaz kerdî
Evrîm Baykand da zonayene ke rapora otopsî de behsê îşkence nêame kerden, doxtoran raporeke bi detay hadre nîkerd. Cipersayişo ke abîya, bi lezîn girotîya. Fermantaranê JÎTEM, azayanê ci aşkere kerdî ke Ayten Ozturk hetê Yeşîl û ekîbê ci bi wesayîta Land-Rover (hetê Walitîya OHAL amê dayen) amê remnayen û berdîya JÎTEMê Dîyarbekîr. Goreyê zonayişan Ozturk îta bi netîceyê îşkenceyê hîrê rojan amê înfaz kerden.
Baykand vist vîrî ke 13ê Kanûne 2011 de Komîsyonê Cînayetê Kiştoxê ci Nêdîyar yê TBMM pî Xidir Ozturkî goştarey kerd û derheqê dozgerînê Elezîz û Tûncelî de serpirodayişê gerreyê sûc ame kerden, bi nayî dosya reyna ra abîya.
‘Hesab dayenê kiştoxan manî kenê’
Baykand aşkere kerd ke malbata Ozturk ke pêrokîn serpirodayiş û rayanê qanûnî ra netîce nêgirot 2013 de dawa kirêşt Mahkemeya Makeqanûna Bingehîn û wina va: “Mahkeme zî qenaat kerd û qerar da ke mukelefîyetê cipersyayişî ameyo îxlalkerden. Yê ke Ayten Ozturk hedef damûsnay, vinî kerdî, bi îşkence qetilkerdî û no sûco ke dûştê mordemîyo nimitî rixmo ke raştîyan zanê îmkanê cezakerdişê kiştoxan nêday û cipersyayişekê rind nêday ramiten.” Baykand da zonayen eke çi îradeyê edlî, çi îradeyê sîyasî hesab dayişê kiştoxan manî kerdî û waşt ke sûckarî desinde bîrê mahkeme û ceza kerden.
Amed de aqibetê Kulter persîya
Amed û Êlih de zî geyrayişê edalet yê malbatê vindîyan dewam kerd. Hurdî nûmayişan de zî aqibetê Hûrşît Kulter persîya. Amed de nûmayişê ronişten ke bi slogana “Vindî bîrê dîyayen, kiştoxî bîrê cezakerden” virazîyeno qora 387. de Parqa Koşûyolu de virazîya. Serokê Şûbeyê Komeleya Heqê Mordeman (KHM)yê Amed Racî Bîlîcî ke nûmayiş de qisey kerd û da zonayene ke vindîbîyayişê binçiman de ramenê. Bîlîcî hayr ant rewşê Îdarekarê DBP yê Şirnex Hûrşît Kulterî ser û aşkere kerd ke xêlê şahîdî estê ke Kulter ameyo binçimkerden.
Bîlîcî ard zon ke no nîame cipersyayiş û taqîpkerdiş la yeno înkar kerden û wina va: “Ma serpirodayişê sazgehanê mavênnetewî yê eleqedar kerd û pawenime ke aqibetê ci bîro aşkere kerden.” Racî Bîlîcî herzewbîn hayr ant qetilkerdişê Vedat Aydinî ser zî û wina va: “Vedat Aydin keseko heqê merdiman heta peynî pawit bi. La bi qurbanê kiştoxanê nêdîyar. Ma her reynî ard ziwan ke dewlet bi nê raybazanê qilêrîn nêşkena netîce bigîro. La cînayetê kiştoxê ci nêdîyar nêvindîyay. Ma zey malbatê vindîyan wazenê ke endî no zilm biqedîyo.
Sanika Abdûlcelîl Kaçar
Azayê Komîsyonê Vindîyan yê KHM Adnan Orhanî zî estanika Abdûlcelîl Kaçar’hi ke hetê quwetanê dewlet 1994 de ame înfaz kerden wend. Orhanî vist vîrî ke Kaçar bi embazanê xo ra pîya serva hewcedarîyanê xo bigîro şîyo navendê Şirnex la hetê quwetanê dewlet amey vindernayen û berdîyê Newala Qesaba. Adnan Orhanî da zonayene ke 4 kesî bi qilifê pirodayişî hetê Tîmanê Herekatê Teybet amey înfaz kerden. 4 kesê ke yenê înfaz kerden tifing nanê ro û erzenê Newala Qesaba. Wexto ke malbatî şinê cenazeyan bigîrê, bi vatenanê ’nê terorîstî yê’ cenazeyan nêdanê. Çapemenî zî no înfaz bi xebera ‘çortalê Sêrt de 4 terorîstî bêtesîr kerdî’ weşîna. Derheqê bîyayiş de pêvacoyê hiqûqî rameno.
‘Cipersyayiş biakerê’
Nûmayişê 387. yê nezdîyanê vinîyan yê Êlih ke Ceddeyê Gulîstan de virazîya de zhi aqibetê Kulter persîya. Sekreterê Şûbe yê Komeleya Heqê Mordeman Devran Yildizî da zonayene ke derheqê aqibetê Kulterî de xêlê sazgehan de serpirodayiş virazîya. Yildizî da zonayen eke rixmê şahît û serpirodayişan heta nika binçim girewtişê Kulter nêame qebûl kerden û derheqê bîyayiş de cipersyayiş nêabîya. Nûmayiş de Wezîrtîya Edaletî rê veng ame dayen û wazîya ke derheqê aqibetê Kulterî de cipersyayiş bîro akerden.
