Lütfen bekleyin..
Munzur Haber / Wa vindetişê Kerbela nîşan bidî

Wa vindetişê Kerbela nîşan bidî

23 Eylül 2018, 09:05

Endamê Komîteya Bawerî û Şaran ya KCKyî Cîhan Erenî derheqê aşma Muharremî de va ‘wazenî elewîtîye cewherê ci ra durî bikerî’ û seba agêrayîşê cewherî veng da heme elewîyan. Erenî dîyar kerd ke nika faşîzm esto û ganî elewîyî zî vera faşîzmî de vindetişê Kerbela nîşan bidî.

BERFÎN BAGDU/ ENES YILDIZ / ANF / BEHDÎNAN 

Endamê Komîteya Bawerî û Şaran ya KCKyî Cîhan Erenî derheqê muhîmîya aşma Muharremî de qisey kerd. Erenî da zaneyene ke elewîyî wayîrê çîyanê baş, rind, demokratîk û komunalan vejîyenî û va ‘ganî elewîyî biagêrî elewîtîya 50-60 serrî verê’.

Erenî va ‘elewîyî hezar û 300 serrî yo ke Kerbela xo vîr anî û bi hîsanê xoverdayîşan têkoşîn danî’ û wina domna: “Seba ke Hz. Huseyînî Kerbela de vera zaliman de xoverdayîşêko tarîxî nîşan dayo, elewîyî ci ra zaf hes kenî û rewşa şînî de ey yad kenî. Şîîyî ser Huseyîn û Kerbela ra xo kerdî dewlete, labelê elewîyî wina nîyî. Mesela Îran wina yo û ewja de înkar esto, îdam esto, heqê cinîyan çin o. Helbuk Kerbela de cinîyî xover dayî. Mesela ewja de Zeynepe xover dany. Labelê elewîyî xoverdayîşî bi no hawa fam nêkenî.”

Erenî bale ant aşma Muharremî ya nikayîne ser û wina va: “Ma ewro vînenî ke aşma Muharremî bi hawayo raşt nêgirîyena dest. Rewşa normale de elewîyî aşma Muharremî de ancîyenî înzîva û dua kenî. Reyna luks û îsraf ra durî vindenî û pakîye esas gênî. Labelê elewîyê nikayînî wina nizdî nêbenî. Ma televîzyon de dî ke tayê elewîyî aşma Muharremî de şîyî seyran û bi def û zurneyî pîroz kenî. Eke o seyran seba na aşme ameyo viraştene, o wext problem esto. Elewîtîya winasî yena munaqeşe kerdene. Ganî Muharremê elewîyan nêbo sey aşma Remezanî.”

Wa sey Kerbela hereket bikerî

Erenî ‘xoverdayîşê elewîyan do senî bibo’ ser o wina va: “Qet şik çin o ke Vakurê Kurdistanî û Tirkîya de zulmêko gird û faşîzm estî. Cok ra ganî vindetişê elewîyan zî sey vindetişê Kerbela bibo. Seke yeno zanayene vindetişê elewîyan hertim prosesanê muhîman de qederê Rojhelatê Mîyanênî dîyar kerdo. Xoverdayîşê elewîyan bi Hz. Huseyînî dest pêkerdo û bi Ebu Muslîmî Xorasanî resayo dûşto tewr berz. Reyna xoverdayîşê Babek û Karmatîyan esto. Nêyî parçeyê elewîyan î. Seba ke ê netîce girewtî, ewro elewîyî estî.  Seyîd Riza sembolêk o û şar dormeyê ci de kom bîyo.”

Ganî biagêrî elewîtîya 50-60 serrî verê

Erenî qiseykerdişê xo de cewab da persê ‘ganî elewîtîyêka senîne bibo?’ û wina va: “Ma sey tevgerî hertim vanî, elewîtîya 50-60 serrî verê senîn ba, ganî ewro zî elewîyî biagêrî elewîtîya 50-60 serrî verê. Ganî elewîyî ver bi ewja şêrî. Xora şert û mercê nikayîn de yê ke eşkenî tewr asan xo goreyê ê wextî eyar bikerî, elewî yî. Çimkî elewîtîye goreyê cewherê komelî ya û bawerîya îqtîdaran nîya. Eke aşma Muharremî wina bêra dîyayene, manaya ci esta. Ez bi na wesîle hêvî kena ke wa heme xizmetê elewîyan ke na aşme de kenî, qebul bibo. Ez vana wa Heq roje û heme xizmetê elewîyan qebul bikero.”

 

Bu haber 53 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Bira ma re xo name ke? Namê to çiko? Kamjî dewe ra wa? Kamjî sarî ra wa?..