Lütfen bekleyin..
Munzur Haber / Ma mewzîyan de yî!

Ma mewzîyan de yî!

02 Şubat 2018, 18:58

"Tena ganî ma xo ra bawer bikerî û mewzîyanê xo nêteriknî. Efrîn do qezenç bikero û faşîzm vînî bikero."

Ma seba ke têkoşîn û xoverdayîşê tewr berz yê tarîxî bidî, mewzîyan de yî. Ma hewl danî têkoşînê xo berz bikerî û mewzîyanê xo zêde bikerî. Beno ke vatişê ‘ma mewzîyan de yî’ ewil tena sey mefhûmo leşkerî bêro famkerdiş. Ya, nê rojan de wezîfeyanê tewr girdan ra yewe zî girewtişê sîlehî û seba pawitişê estene, şar û ameyeyê xo berzkerdişê têkoşînî yo. Ewro bi hezaran ciwanê kurd, çepgir, sosyalîst û kesê ke vera faşîzmî de yî, beşdarê têkoşîn û xoverdayîşê estene benî. Tena hetê leşkerî yê mewzîye çin o, kişta leşkerî de hetê sîyasî, îdeolojîk û komelkî zî estî. Eke merdim bi hawayo kilmî vajo; yê ke problemê înan yê azadî, seyyewbînanî û demokrasî estî, ewro mewzîyan de yî. 

Ewro zaf hetê xoverdayîş û şerê îradeye yê Efrînî xoverdayîşê Kobanê manenî. Hetta bi tayê hetanê xo reyde xoverdayîşê Efrînî, xoverdayîşê Kobanê derbaz kerdo. Ferqo yewin; xoverdayîşê Efrînî bi ruh, hîs û têkoşîno ke prosesê Kobanê derbaz kerdo, yeno dayîş. Kobanê de yê ke hêriş kerdêne dewleta tirk û DAIŞo ke hetê hêzanê mîyanneteweyîyan ra amebî xeylqkerdiş bî. Tayê partîyê sîyasî û şexsîyetî hêrişanê DAIŞî tena vera Kobanê de dîyênê, înan ferq nêkerdênê ke nê hêrişî raştîya xo de estena heme kurdan hedef gênî. Reyna tayê bi hawayo şikin nizdîyê tespîtê Tevgerê Azadîye yê ‘dewleta tirk û Serekkomarê tirkî bi xo destek danî hêrişanê DAIŞî’ bîyênê. Tayênan nê tespîtan sey propagandaye dîyêne. Nê kesî ferqê girdîya tehlukeyî de nêbî. Nînan ra tayê ci zî na rewşe ver Îdareyê Xoserî yê Rojawanî, YPG û YPJyî sucdar kerdênê. 

Wext tespîtê Tevgerê Azadîye raşte vet. Zelal bî ke yê ke Kobanê de hêriş kerdêne, dewleta tirk bi xo ya. Vejîya orte ke dewleta tirk dişmenê kurdî ya û seba ke kurdî çinî bikero, heme çî kena. Dewleta tirk na dişmenîya xo tena Kobanê de nê, dima ra Vakurê Kurdistanî de bi veşnayîş û rijnayîşê bajaranê kurdan nîşan daye. O wext bi hezaran kesî ameyî qetilkerdiş, ciwanê xoverdakarî bi hawayo ganî ameyî veşnayîş. Wexto ke dewleta tirk reaksîyonêko gird vera xo de nêdî, Kobanê û tewr peynî zî Efrîn de eynî çîyan kena. Efrîn de yewna rey vejîya orte ke Erdogan dişmenîya kurdan de sond werdo. Cok ra ewro vera dewleta tirkî de rik û nefretê kurdan vejîyayo dûştêko tewr berz. 

Ferqo dîyine zî; êdî dûştê çalakîyanê domdarî aver şîyo. Kurdî û dostê kurdan ewro çalakîyê ke domîyenî, kenî. Ewro kurd û heme şorişgêrî payan ser o yî û çalakîyan organîze kenî. Tîya de sey kêmanî zî merdim eşkeno bêvengîya Vakurê Kurdistanî nîşan bido. Ewro çîyo ke Vakurê Kurdistanî ra yeno pawitiş o yo ke sey prosesê 6 û 8ê Teşrîna verêne ya Xoverdayîşê Kobanê, ewro seba Efrînî zî biwerzîyo payan ser. Hema erey nîyo û hêz, zanayîş û hêrso ke nêyî bikero zî, estî. Ewro heme kurdî Vakurê Kurdistanî ra nêyî paweno û bitaybetî zî şerwanê azadîye ke bi îradeyêka girde xover danî.

Ma ewro xoverdayîşê Efrînî de yewna rey vînenî ke ma ancax eşkenî bi zanayîş, rêxistinbîyayîş û têkoşînî mewzîyê xo gird bikerî. No zî ferqêko muhîm o. Xoverdayîşê Kobanê wexto ke bi serewedarnayîşê 6 û 8ê Teşrîna verêne bî yewe, îmkanê serkewtişî vejîya orte û o wext tayê hêzan nêyî seba menfîetê xo dîyî. Ma zanayêne ke nê hêzê ke nê xoverdayîşî firsend dîyî û herême de bica bîyî, averşîyayîşê Tevgerê Azadîye seba menfîetê xo baş nêvînenî. Yê ke ferqê nêyî de nêbî, dagîrkerî û emperyalîzmî baş nêşinasnayênê.

Tevgerê Azadîye hertim cinî, bindest û sewbîna hêzan reyde îttîfaq viraşto. Ma nika zî hewl danî Efrîn de mewzîyanê xo bipawî û gird bikerî. Herçiqas ke hêzê emperyalîstî yê mîyanneteweyî bazarî û dişmenîyan kenî zî ma nê waştişê xo domnenî. Hêrs, rik û nefrete ciwan, cinî, bindest û hêzanê demokrasîyan do nê îttîfaqanê lêminan parçe bikerî û zorê faşîzmê Erdogan û Bahçelîyî bîşêrî. Tena ganî ma xo ra bawer bikerî û mewzîyanê xo nêteriknî. Efrîn do qezenç bikero û faşîzm vînî bikero.

Fatma ADIR / Politika

Bu haber 198 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Bira ma re xo name ke? Namê to çiko? Kamjî dewe ra wa? Kamjî sarî ra wa?..