Lütfen bekleyin.. Lütfen bekleyin..
Kurdî û şarê bînî do tarîxê 20ê Çileyî xo vîra nêkerî û ganî xo vîra nêkerî zî. 20ê Çileyî ra dima dewleta tirkî seba ke qirkerdişêko newe vera kurdan de bikero, bi 72 teyarayan hêrişê Efrînî kerde. Nika tayê şîroveyan de fam beno ke bîlasebep bi 72 teyarayan hêriş nêkerdo, bingeyê nê hêrişî de çîyê tarîxî estî. Tayê şîroveyan de aseno ke na hûmare hûmarêka sembolîke ra zêdeyêr, manayêka na hûmare esta. Xora wexto ke dewleta tirkî hêrişê Karaçog û Şengalî kerdbî, nê hêrişê xo bi hawayo zanaye raştê 24ê Nîsana 2017î yanî serrgêra Qetilbîyayîşê Armenîyan ardbî. Dewleta tirk derheqê tarîxê qirkerdiş û qetlîyaman de wayîrê vîrêko kehen a û wexto ke hêrişê muxalefetêkî bikera, ser hişê tarîxî ra hêriş kena.
Netewedewlete û hêzê statukoperest û dagîrkerî tehamulê qezencanê kurdan nêkenî û hêrişê nê qezencan kenî. Nê hêrişî zî benî aktuelkerdişê tarîxî. Cok ra dewleta tirkî hertim qirkerdişî dana ma vîr û hewl dana ke ma bitersna û teslîm bigîra. No operasyono peyên zî bi masnayîşê medyaya şerê taybete û raştîye ra dure ame viraştiş. Goreyê medyaya şerê taybete do 72 teyarayî heme çîyî hal bikerî û dima ra do ‘mehmetçîk’ û çeteyî bikewî Efrîn û dagîr bikerî. Nînan xo no het de îqna zî kerdbî. No ‘serkewtiş’ ke hetê îttîfaqê faşîstî yê Erdogan û Bahçelîyî ra amebî îlankerdiş, tena medyaya şerê taybete nê, CHP zî tede heme hêzanê sîyasîyan zî antbî mîyanê xo. Yan zî do bi ‘îttîfaqê mutabakatê mîllî’ ser Efrîn ra heme Rojawanî dagîr bikerdêne û dest bironayêne ser de.
Wexto ke teyarayê ke Efrîn de cinî, doman û merdimê ke DAIŞ û El Nusra ra remaybî, bombe kerdênê, na rewşe qasê Erdogan û Bahçelîyî, Kiliçdaroglu zî heyecanin kerdbî. Cok ra Kiliçdaroglu bi vazdayîş şî, Serekwezîr Yildirimo ke kuklaya Erdoganî yo zîyaret kerd. Tena bi nêyî sînordar nêmend, verê çimanê rayapêroyî de pesnê Serekwezîro ke her roje heqaretê ci kerdêne, da û spasîya ci kerd. Kiliçdaroglu bi no hawa destek da qetilbîyayîşê doman û cinîyê kurd, ereb, tirkmen, asurî-suryanî û elewîyan.
O wext no Kemal Kiliçdaroglu kam o? Kamcîn zîhnîyetê sîyasî temsîl keno? Çira hende bi zewqêko gird destek dano faşîzmê Erdogan û Bahçelîyî? Ganî merdim yewna rey dîyar bikero ke no merdim keso ke eslê xo înkar kerdo yo. Dêrsim de kesanê winasîyan rê heramzade yeno vatiş. Heme şexsîyet, nasname û ameyoxa heramzadeyî, ser înkar û redkerdişê raştîya xo ra şekil gênî. Hetta her înkar ci ver bi hîna zaf înkar û îxanetî beno. Na rewşe heta ke heramzade reseno tewr binî, dewam kena. Ya, Kiliçdaroglu kurd û elewîtîya xo înkar keno û nê înkarkeran ra yê sifteyînan ra yo. Kiliçdaroglu ewro pawitoxîya zîhnîyeto ke Tertele û Qetlîyamê Dêrsimî kerdo, keno û domnayîşê nê zîhnîyetê qetilkerî sey wezîfe û berpirsîyarîya xo vîneno. No eynî wext de nimûneyê aşiqê qatilê xo bîyayîşî yo.
Wexto ke merdim partîya Kiliçdarogluyî zî rono hetê na raştîye, o wext rewşe xo bi xo yena famkerdiş. Çimkî Kiliçdaroglu ewro ser partîya ke Terteleyê Dêrsimî viraşto de yo. Heta nika na partîye no derheq de tena rexneyêk daxî nêkerda û ozrê xo nêwaşta. Awanbîyayîşê Komare ra nata heme qirkerdiş û qetlîyamê ke vera kurdan de ameyî kerdiş de rolê na partîye rolêko esasî yo. Kiliçdaroglu zî ewro na rewşe domneno.
Ya, no Kiliçdaroglu destek dano heme plan û qirkerdişê lêmînî ke vera erdê Efrînî ke Dr. Nûrî Dêrsimî tede rakewte yo de benî. Nûrî Dêrsimî o kes o ke heme cuyayîşê xo seba xoverdayîşê Dêrsimî û azadîya şarê kurdî feda kerdo yo. Tena yewe wesîyetê Dr. Nûrî Dêrsimî ke eslê xo dêrsimij o, esto. Nûrî Dêrsimî wesîyetê xo de dîyar keno ke heta ke raştîya dewleta înkarker û qetilkere nêro derbazkerdiş û kurdî azade nêbî, wa ti kes esteyanê ci nêbîşêro erdê ke binê kontrolê dewleta tirkî de yî. Dr. Nûrî Dêrsimî wazeno heta ke polîtîkaya dagîrkerîye Kurdistan de nêqedîyo, wa wesîyetê ci dewam bikero. Mezelê Nûrî Dêrsimî Efrîn de yo.
Dr. Nûrî Dêrsimî welatperwerîya xo ya xorî û dejanê xo şîîran de neqişnayo û bi no hawa cuyayo. Hîna zî welatperwer û ciwanê kurdî şîîrê ke Nûrî Dêrsimî tede welatperwerî û xoverdayîşî vato, ra miqate benî. Heta nê şîîrî ewro hetê têkoşîn, welatperwerî û xoverdayîşî de ruh danî ciwananê kurdan. Ewro hêrişê ke çarçeweya Sureya Fetihî de yenî kerdiş û hetê Kiliçdarogluyî ra yenî destekdayîş, vera erdê ke Nûrî Dêrsimî tede rakewte yo de benî. Manewîyat û ruhê xoverdakarî yê Nûrî Dêrsimî ewro hêzêko gird dano ciwan û şorişgêrê ke goreyê wesîyetê Nûrî Dêrsimî hereket kenî. Ciwanê kurdî do dersêko gird bidî yê ke seba dejnayîşê ruhê Nûrî Dêrsimî şonî. Efrîn do qezenç bikero û faşîzm do vînî bikero.
Fatma ADIR / Polıtıka
