Lütfen bekleyin..
Munzur Haber / ‘Wazenî reyna qetil bikerî’

‘Wazenî reyna qetil bikerî’

19 Aralık 2017, 18:19

Ewro serrgêra 39. ya Qetlîyamê Gurgumî yo. Serrgêra qetlîyamî de şahidê qetlîyamî derheqê qetlîyamî de qisey kerdî. Şahidan ra Guneş Demîre dîyar kerde ke aye nêşêna xo vîra bikera û wina dewam kerde: “Yê ke vizêr beranê nîşan kerdî, ewro zî wazenî ma qetil bikerî.”

19ê Kanûna 1978î de Gurgum de vera elewîyan de qetlîyamêko hîra amebî viraştiş û bi seyan elewîyî merdbî. Ewil bombeya vengî erzîyaye salona sînemaye û dima ra ame vatiş ke ‘elewîyan bombe eşta’ û hêrişî dest pêkerdbî. Taxê Yenîmahalle, Serîntepe, Magarali, Karamaraş, Yorukselîmî de hêrişî zêde bîbî û netîceyê hêrişan de bi seyan elewîyî ameybî qetilkerdiş. 

Ewro serrgêra 39. ya Getlîyamê Gurgumî yo. Herçiqas ke hende serrî hedîse ser ro derbaz bîyî, labelê reyna zî dejî sey roja sifteyîne teze yî. Babete ser o bi nameyê Velî Demîr û Guneş Demîre de 2 kesê şahidîya qetlîyamî kerdbî, qisey kerdî. 

Velî Demîrî va ‘hedîseyî ewil bi bombekerdişê Sînemaya Çîçekî û kişîyayîşê 3 elewîyan reyde dest pêkerdî’ û wina dewam kerd: “Wexto ke hedîseyî dest pêkerdî, ti kesî nêşîna banê xo ra vejîyo. Dormeyê ma de 3-4 cîranê ma ameyî kiştiş. Ma zaf tersaybî. Gurgum dejê pîlî dîyî û bi desan merdimî ameyî kiştiş. Hedîseyî bi vatişê ‘camîyî dest ra şonî’ dest pêkerdî, labelê ti kesî hêrişê camîyan nêkerdbî. Ciwanê taxa ma ti bêrezîye nêkerdbî.”

Elewî zî sunî zî çiman ser 

Demîrî dewamê qiseykerdişê xo de wina va: “Yê ke Hezretî Huseyînî ra hes nêkeno, Hezretî Muhammedî ra zî hes nêkeno. Ez kişta dayîka xo ra sunî, kişta pîyê xo ra zî elewî ya. Her di hetî zî çiman ser o. Cîranîya ma zaf baş bîye. Elewîyî zî sunîyî zî vera herkesî de rêzdar bî. Ez hem rojeyê şînî û hem zî yê Remezanî gêna. Çimkî wexto ke cîranê min o sunî nefsê xo terbîye bikero, ez nêşêna biwera û bişima; çîyêko weş nîyo.”

 

‘Ewro roja cîhadî ya’

Guneş Demîre zî dîyar kerde ke qelebalixo ke kom bîbî, bi vatişê ‘komunîstan veramedê, seba Homayî serebirnê, ewro roja cîhadî ya’ qîrayênê û wina dewam kerde: “Nînan hêrişê taxanê Yenîmahalle, Serîntepe, Magarali, Karamaraş, Yorukselîmî kerdî. Badê ke nê taxî ameyî bombekerdiş û veşnayîş taxî girîyayî binê abluqa. Kiriştişê merdeyan, neqilkerdişê nêweşan yê nêweşxane ameyî astengkerdiş. Merdimî cinî, doman, diganî, nêweş, birîndar nêame vatiş, heme ameyî qetilkerdiş. Ez o wext 31 serre û diganî bîya. Ma ê rojî qet yenî vîrîkerdiş? Heme çîyan verê ra amade kerdbî. Mesela verê ra keyeyanê ma nîşan kerdbî. Dima ra ma fam kerd ke seba ke ma bikişî, nîşan kerdî.” 

Dewlete tena temaşe kerde

Guneş Demîre dewamê qiseykerdişê xo de va ‘hêrişê heta 24ê kanûne dewam kerdî’ û wina domnaye: “Dewlete ti mudaxale nêkerde. Hêrişkarî bi sîleh û kardîyan hêrişê ma kerdênê. O wext heme merdimanê bêpawitişan qetil kerdî. Dima ra leşkerî ameyî û rewşa îstîsnayî ameye îlankerdiş. Hêrişan ver cenazeyî erd de mendî. Zaf cenazeyî dima ra morgan ra ameyî vetiş. Ewro dormeyê Meletî de zî beranê elewîyan nîşan kenî. Yê ke vizêr beranê nîşan kerdî, ewro zî wazenî qetil bikerî.” 

Politika

Bu haber 342 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Bira ma re xo name ke? Namê to çiko? Kamjî dewe ra wa? Kamjî sarî ra wa?..