No kultur do bidomîyo

3ê kanûna 1994î de bîna û 2 buroyê Rojnameyê Ozgur Ulke ameybî bombekerdiş û netîceyê bombekerdişî de bi nameyê Ersîn Yildizî de xebatkarêk merdbî û tayê rojnamegerî zî bi hawayo giran birîndar bîybî. Mudurîya asayîşî zî rojnamegeranê birîndaran tepiştbî û înan bi bombekerdişê rojnameyî ra sucdar kerdbî.

Kesê ke o wext bîna de bî, înan ra yewe zî xebatkarê îdareyî yê rojnameyî Nurdogan Aydogan bî. Aydogan qisey kerd û qala ê rojan kerd. Aydoganî va ‘rojnameyê Ozgur Gundemî wextêko ke heme muxalîfî ameybî bêvengkerdiş de dest bi weşanî kerdbî’ û wina dewam kerd: “O wext têkoşînê gerîla dest pêkerd û dewlete waştêne bi zext, îşkence û qetlîyaman netîce bigîro. Cok ra heme çapemenîya muxalîfe bêveng kerdbî. Muxabîrê rojnameyî yew bi yew hetê kontrayanê dewlete ra ameyî qetilkerdiş. Cezayê zîndanî, sansur, qedexe û cezayê pereyî ameyêne dayîş. Dima ra nê wezîfeyê xo dewrê Ozgur Ulke kerd.”

Ma bi xelatî ameyî war

Aydoganî qala hêrişî kerd û wina va: “Xebatê ma bi hawayo normal dewam kerdênê. Çapê ma yê Îzmîr û Anqara bi hawayo normal şîyî. Tewr peynî çapê Stenbolî zî temam bî. Dima ra embaz Ersînî heme embazan keyeyê înan de rona. 20 embazî rojname de estbî, 6 embazî qata zemînî de bî, yê bînî qata corên de mendênê. Serê sibayî saet 03-04.00 de teqayîşêko gird bî. Ma heme balkon de kom bîyî. Ma waşt merdîwanan ra bêrî war, la şewat vejîyabî. Qereqol nizdîyê ma bî, labelê nêameyî. 1 saete ra dima îtfaîye ame û ma bi xelatî ameyî war. Embazê cêrî giran birîndar bîybî, polîsan ma tepişti. Seke ma bombe kerdo, destanê ma ra nimûneyî girewtî. Dima ra ma musayî ke Ersîn şehîd kewto. Avûkatan dîyar kerd ke do rojname bivejîyo, o wext kêfê ma ame ca.”

Zextî parçeyê şerî yî 

Aydoganî peynîya qiseykerdişê xo de wina va: “Zext û tedayê ke çapemenîye ser de estî, parçeyê şerê topyekunî yî. Wazenî teslîm bigîrî, labelê ê nêşênî netîce bigîrî. Hende tewqîf kerdî, labelê tena kesêk daxî fek xebatanê xo ra veranêda. Têkoşînê xo zere de û dima ra teber de domnenî. No daxî cewab o. Helbet ganîma piştîdayîşêyewbînanî gird bikerî.” 

Politika