Lütfen bekleyin..
Munzur Haber / Ma soz dayo Fermandare Delal Amede...

Ma soz dayo Fermandare Delal Amede...

24 Kasım 2017, 20:41

Yê ke sermaye, bawerî û xidayê înan heskerdiş o ra bîye. Rayberê kesê ke zerrîya xo singê xo rê kerdbî nuşte û kewtbî rayîr, înan ra bîye. Felsefeya aye tewr vernî de bîyayîş û erey nêmendiş bîye…

Seba resayîşî lazimî bi rayîrşîyayîşî estbî, hem zî bi hawayo bêteredut. Eke hedef seba ameyoxa azade xebetîyayîş bo, to zî sey yê bînan vatêne ‘lazim o ez ver bi cayo ke zerrîya mi mi bena de şêra’.

Aşma nîsana ke varan varayêne de ma pêro pîya têhet de bî. O wext tebîet bereketin bî. Wextê rayîrkewtişê gerîla bî. Ma hewl dayêne çîyê ke ma musaybî bierzî pratîk û tecrube bikerî. Embaze Delal Amede zî çîyê ke zimistanî dîybî reyde heyecanê şîyayîşê Botanî cuyayêne û sey her wextî bi qerardarîya serkewtiş û qezençkerdişî. Na qerardarîya embaza Delale bi hêrişê 2015î yê dişmenî hîna qewetin bîybî. Aye zî heme amadekarîyê xo seba vengvetişê hêrişê îmha û çinîkerdişî yê dişmenî kerdêne. Ya, şîyayîşê embaze Delale (Hulya Eroglu) yê Botanî, vera hêrişanê dewleta tirkî de bi hawayo fedaîye vindetiş bî. Aye seba şîyayîşî xeylê sebeban xo het de kom kerdbî. 2 serrê ke seba dîyalogî ameybî derbazkerdiş de dewleta tirkî seba şerî amadekarîye kerdbî. Nîşaneyo tewr zelal yê nêyî, hêrişê 24ê Temmuze bî. Ma o wext nînan cuyayî.

24ê Temmuza 2015î de ma grûbêk bîyî meymanê Embaza Delale. Tabî seba ma heme ca mekanê ma bî. Labelê embaza Delale sey berpirsîyare, nêwaştêne embazan caverdo û şêro. Seba şorişgêrêk eke wezîfe şîyayîşî ferz bikero, ganî hertim şêro. Sewbîna cayan de yê ke paweyî embaza Delale bî, estbî. Her ke ver bi aver game eştêne, aye game Delal tepîya ver bi ma ardêne. Gelo nêwaştêne ke embazan ra biqerfîyo, yan zî zanayêne ke çîyê winasî do bibo? Bi hawayo mecbûrî vejîyabî rayîr, labelê zerrîya aye rehet nebîye.

Embaze Delal şîybî û roja ma ya mendeyan bi hawayo qelebalix derbaz bîybî. Ma heta şanî munaqeşe kerdbî û îxtîmalan ser o vindetbî. Munaqeşeyan de çîyo ke vejîya orte o bî ke dewleta tirk do hêrişêko hîra bikero. Çimkî nîşaneyê destpêkerdişê konseptê hêrişêko newe estbî. Cok ra warê azadan de her mekan prosesê munaqeşe û qerardayîşî cuyayêne.

Dewleta tirk heme amadekarîyê xo kerdbî û seba derbe dayîşê Tevgerê Azadîye ro firsend pawitêne. Goreyê xo 24ê Temmuze sey wexto tewr munasîb dîybî û qerar girewtbî ke aye şewe hêrişo tewr gird yê hewayî bikero. Heto bîn ra 24ê Temmuze serrgêra Peymana Lozane bî. Ya, dewleta tirk aye şewe bi hawayo zanaye weçînaybî. Waştêne yewna reye derheqê Kurd û Kurdistanî de heme çîyan çinî bikero. Heme amadekarîya xo seba nêyî kerdbî. Embaze Delale teberê hedefê nê hêrişan de mendbî. Seba ke nêy hezm nêkerdbî, çend rojî ra dima ameybî hetê ma. Hêrişê ke şewe dest pêkerdbî, ver bi sibayî tayê kêmî bîybî. Ma nêşînaybî Embaze Delale bivindarnî. Ma hîna Embaze Delale reyde newe ameybî têhet û aye hîna newe dest bi vatişê hîsê durbîyayîşî kerdbî ke reyna vengê teyarayan amebî. Teyarayan pêsero pêsero bombeyê ke bi tonan giranîya înan esta, vistbî ma ser de. Hêrişî heta serê sibayî dewam kerdbî. Labelê ma reyna zî vatişê xo domnabî. Dima ra wextê pratîzekerdişê vatişî amebî.

Nê hêrişî Embaze Delale de qerardarîya şîyayîşê Botanî aver berdbî. Şexsîyetê şorişger, rayber û mîlîtanî hertim tewr vernî de cayê xo girewtêne. Fermandare Delal Ameda ke têkoşîn çi aye ra biwaştêne kerdêne, na rey bi hawayo eşq ver bi Botano ke ruhê Kurdistanî yo şîybî û resaybî ewja. Botan ameyêne manaya xoverdayîş û fedakarîye. Çimkî Kurdistan herçiqas ke hende îxanetê zereyî estbî, reyna zî xover dabî û fedakarîya ke lazim bîye nîşan dabî. Fermandare Delal Amede û Azê Malazgîrte zî bîyî abîdeyê îlahe yê nê qerardarî û xoverdayîşî. Cok ra seba şehadetanê Bestayî, cewabê ma do girdkerdişê xoverdayîşî bibo. Ma yewna rey vanî ke do ‘waştişê înan qirika înan de bimano’. 

Fatma ADIR / Politika

Bu haber 316 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Bira ma re xo name ke? Namê to çiko? Kamjî dewe ra wa? Kamjî sarî ra wa?..