Lütfen bekleyin..
Munzur Haber / Reyna polîtîkaya ‘zazacitîye’

Reyna polîtîkaya ‘zazacitîye’

24 Mayıs 2017, 23:55

Hikûmeta AKP polîtîkayê letekerdiş û înkarkerdişî ke dewlet seserran o xebetnena kena aktuel. Bi na polîtîka wazena vernîya netewbîyayîşê Kurdan bigîro. Seba nayî, reyna polîtîkaya “zazacitîye” visto dewre.

Hikûmeta AKP ya ke tehamulê kurdan û ziwanê kurdî nêkena, bi desan rojname, televîzyon, komel, enstîtu û organîzasyonanê kurdan yê ke tenya xizmetê ziwanî kerdî girot. Nînan ra yewe zî JIYAN TV bi ke bi kirmanckî weşan kerd o. Eynî AKP nika zî çarçoveyê polîtîkayê letekerdişî de projeyekê newe vist dewre. 

AKP ya ke îdia kena ke kirmancî kurdî nîyê, bi wasitayê zazacitîye hadreyînê ronayîşê ‘Partîya Zazayan’ kena. Partîya ke yeno pawiten ke heta peynîyê aşmê waştişnameyê ronayîşî bido Wezaretê Karê Zerrî bi şiklekê korsanî yena ronayen. Seba na partî yew ca zey merkez ameyo akerdiş û alaya partî zî hadre bîya. Goreyê beyanatê korsane, vajîya ke, na partî do “Prensîbanê Ataturkî û rejîmê Komara Tirkîye” esas bigîro. 

Ser înkarî ra teba nêvejîno

Verîya nika zî bi nameyê “Zaza-Der” komelêke daya ronayene. Pêşengîyê no projeyê AKP zî AKPyijê zey Cevdet Yilmaz, Serokê şaredarîya Çewlîgî yo AKPyij Yucel Barakazî, Serekê Pêroyî yê “Konfederasyonê Qorîcîyan û Keyanê Şehîdan” Zîya Sozen, çend rojnameger û hunermendê Çewlîgî yê AKPyijî kenê. 19ê Sibate de Anqara de kombîyayîşeke “Zaza-Der”î  virazîya. Kesê ke tewrê kombîyayîşî bîyî vatî, “Ma kurdî nîyê, ziwanê ma lehçeya kirdkî nîya. Ma kurdan ra cîya yê.” Hemserokê verên yê Kurdî-Der Sabahattîn Gultekîn ke derheqê babed de qisey kerd vist vîrî ke, seba ke serdest û neyarê kurdan, tim yewîtîya kurdan ra tersayê, tim û tim waştê kurdan perçe bikerê, seba nayî zî raybazê cîya cîyayan bikar ardê. 

‘Kurdo tewr baş kurdo merde’ yo

Gultekînî dîyar kerd ke ge-ge ol, ge-ge mezhep, ge-ge zî feodalîteya kurdan, eşîratî bi kar ardê û wina dewam kerd: “Terqa Şêx Seîdî de vatî “eşqîya û hetkarê Îngilîzan”, Tertelêya Dersime de vatî “Qizilbaş”, serranê 80’yî ra dima zî vatî “Ermenî”. La yê ke amey kiştiş, sirgûnkerdiş û talankerdişî bi elewîtî, sûnîtî, kurmanctî û zazatîya xo, pêro kurdî bîy. Na dewleta ke nê qetlîamî şarê kurdî sero pêk ardî, cîyayîyêke nêviste mabêna kurmanc, zaza, elewî û şafîyan. Seba înan heme kurdî bîy û “kurdo tewr baş kurdo merde” bi. 

Xayînê şarê xo, nêbeno dostê neyaranê xo zî 

Gultekînî vist vîrî ke bi sebebo ke kurdî sîyasetê Rojhelatê Mîyanênî de bîyê aktor, dewleta tirke seba vernîgirewtişê nayî kewta mîyanê kayê qilêrinan dima.  

Sabahattîn Gultekînî aşkere kerd ke tu kurdêko/zazayêko wayir exlaq, wijdan û şerefî nêbeno aletê na polîtîkaya qilêrine û va, “Beno ke çend xoroşî, seba çend estikanê ke Erdogan berzo înan ver bibê amûrê na bêexlaqîye. Beno ke mîyanê înan de parlamenterî zî est bê. Wa ê zî Wekîlê Dersime Hesen Xeyrî Begî bîyarê vîrê xo.” Gultekînî vist vîrî ke neyarê Kurdan, bi taybetî zî dewleta tirke, baş zanena, yo ke şarê xo rê xayintîye bikero, nêbeno dostê neyaranê xo zî. Tarîx de nimûneyê naye zaf ê.

Do ser nêkewo!

Nûştoxê rîpela kirmanckî yê rojnameya ma Haydar Diljenî zî nuşteyê xo yê “Adresa ‘zazacitîye’ ya newa û Anqara de kombîyayîşe!” yê 6ê Adare de hayr ant na babede ser o û wina nuştbi: “Heta nika kişta dîn, mezheb, eşîrîye ra kurdî veradayê pê û îdare kerdê, no qor wazenê adirê zazacitîye gurr bikerê û nîfaq dekerê kurdan mîyan û kirmancan (zazayan) kurdan ra abirnê. Belkî demeyê tayn zazayê ”rantçî” vayê na polîtîka ver kewê, labelê şarê ma kayanê osmanîyan verî ra baş nas keno û cora zî paştîya xo pa girê nêdano. Dewlete na polîtîka verî zî ceribnê, labelê nêşa ser kewo. No qor zî do ser nêkewo!”  

Politika

Bu haber 641 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Daimi Doğan nusna: “Dersîm de îtîqat be zon jûvînî ra pêrabestî yê. Vajîm..