Lütfen bekleyin..
Munzur Haber / Daîmî Dogan / WEÇÎNÎTÎŞÊ DÊRSİMÎ

Daîmî Dogan / WEÇÎNÎTÎŞÊ DÊRSİMÎ

20 Mart 2017, 17:18

"Dêrsim, weçînîtîşê 7 hezîrane de(amnona verêne)hem tecelê xo rê rae kerde ra, hem kî resimo pîl vênit û rijîyayîşê bend rê kî poşt da."

Dêrsim na weçînîtîş de reyê xo hetê xoverdayîşê tarîxê xo, hetê haştîye û reng û renganêna xo ser eşt. Reyna bî eskera kî Dêrsîm reyê xo zon û zagonê xo rê, îtîqatê xo rê da. Helvet tayîne qazanç kerd, tayîne kî vînd kerd.

WEÇÎNÎTÎŞÊ DÊRSİMÎ

DAÎMÎ DOGAN

Dêrsim, weçînîtîşê 7 hezîrane de(amnona verêne)hem tecelê xo rê rae kerde ra, hem kî resimo pîl vênit û rijîyayîşê bend rê kî poşt da. Dêrsim na weçînîtîş de reyê xo hetê xoverdayîşê tarîxê xo, hetê haştîye û reng û renganêna xo ser eşt. Reyna bî eskera kî Dêrsîm reyê xo zon û zagonê xo rê, îtîqatê xo rê da. Helvet tayîne qazanç kerd, tayîne kî vînd kerd. 

Hen aseno ke îyê ke namê welatê xo rê Dêrsim vanê, înû qazanç kerd. Îyê ke hona, xo lacê tirkû sa kenê û namê welatî rê Tuncelî vanê înû vînd kerd. Kamjî sîyaset ke Dêrsim rê hetê zon û zagon ser, îtîqat ser soz da û xoserîye wad kerde înû qazanç kerd. Kamîjî kî namê Meydano Qişla vurna kerd Meydano Sey Riza înû qazanç kerd. Îyê ke 10ê payîza peyêne de sonê hucbarê Atatirk, dima Sey Riza rê anor wazenê înû vînd kerd. Îyê ke zonê dayike de perwerde vazenê înû qazanç kerd. Îyê ke pankartû anê war înû vînd kerd. Îye ke wedardena ‘Wadê ma’ rê heredînê, îyê ke tarîxê Alawîyû xo vîra kerd, îyê ke Anqara de verva azperestû nîşanê ‘bozkurt’ viraşt înû vînd kerd. Îyê ke jênosîdê 1937-38î xo vîra nêkerd înû qazanç kerd, îyê ke “Dêrsîmjî rind ke cavurnîyê, kişîyê çike nîya bîyê wayîrê medenîyet” vanê înû vînd kerd. Îyê mêrasê tarîxê xo rê wayîrên kenê, îyê ke jûbîyayîş kerdo, poşt do jûbînî înû pêro bendî riznayî. Îyê ke peyê xo çarno înû vînd kerd.

Dêrsîmîjî, weçînîtîşê 7 hezîrane de jûbîyayîşê dêmdarû ra HDP vake. No qerarê xo ra ameyox(bîrokî) de çitur jû Dêrsim vazenê o kî nîşan kerd. Dêrsîmîjî na weçînîtîş de îtîqatê xo rê, kamîya xo rê, zonê dayika xo rê, jîyar û dîyarûnê xo rê wayîr vejîyayî. Dêrsimîjî na weçînîtîş de duştê bendû de vengê xo jêdena kerd berz. Dêrsîmîjî weçînîtîşê xo ra îyê ke hem çî rê nîyadox manenê înû rê derse dê. Dêrsimîjî îyê ke sarê Dêrsimî depoyê rey vênenê, hama zobîna bêçika xo nêlewnenê înû rê kî dersê dê. Dêrsimîjî verênî ra hata na waxt çitur ke cênîyû rê hurmet kerdîbî, na weçînitîş de kî o musna, Êdîbe ŞAHÎNe rusna meclîs. Dêrsîmijî dêmdarêna xo xoverdayîşê Alîcan ONLU de musnit. Dêrsimîjî îyê ke verê xo çarnenê raştdarû, îyê ke aşîretên kenê înû rê derse dê.

Dêrsim 7 hezîrane de jû rojevê xo nê, rojevê Tirkîya ser kî vatîşê xo vake. Dêrsim, hete ra xo ra tayê çîyî vênit û ‘Royê Kobanê’ rê kî wayîr vejîya. Dêrsim, Iraq de, Surîya de bêçika kam esta, IŞÎD pîncê kamo no rind fam kerd û cayê xo leyê qomê mazlumû de venit. Dêrsim na weçînîş ra Xoverdayîşê Gezî  kî xo vîra nêkerd. Dêrsîmîjî weçînîtîşê xo ra xezevtulayêna hukmatî û dewlete rê kî êndî beso vake. Dêrsimîjî îyê ke sîstemo serekîye ra, waşt ke xezevtulayên ronê, înû rê kî derse dê. Dêrsim na weçînîtîşê xo ra jû bendê xo nê, bendê Tirkîya kî riznayî. Cayê xo hetê demoqrasî de vênit.

Dêrsim de jû weçînîtîş qazanç nêbî. Dêrsim de jubîyayîş, poşt jûbîndayîş û royê mucadele qazanç kerd. Dêrsim de wayîrê îdeolojîye dewlete vînd kerd. Çike dewlete namê Dêrsimî, kamîya Dêrsimî, zon û zagonê Dêrsimî û îtîqatê Dêrsimî waştene ke wedarîyo. Dêrsim jû fek ra na weçînîtîşê xo ra vake ke ‘ma xo vîra nêkeme.’ Ne zulmê sima, ne huşkê sima xo vîra keme. Çike ma pîrikû û kalikûnê xo rê soz do. Hata ke sima ravêrde xo de têrîyên nêkerde, sima ef nêkeme. Guman çîn o ke pêro Dêrsimîjî jê jûbînî kî nêfikirîyayî. Hona tayê zobîna rêçe ra kî sonê. Dêmdarê Dêrsimî gereke vengê nînû kî bihesnê. Hen bikere kî înû ra kî poşt bîjêrê. Çike meselê Dêrsimî jê koyê Jêle berz ê. Qeweta xo jû kere ke bas bikerê.

 

RAST KERDİŞ:

Rojnameya Dêrsimî  temmuze 2015, rîpel 16îne de xeletîye ra meqala Daimi DOĞAN(Weçînîtîşê Dêrsimî) rê, name Daimi Cengiz nusnîyo. Serva na xeletîye nustoxê xora û wendexû ra ef wazeme.

Bu haber 27 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
'Tarixê Dîna zulmê zulimkaru ra piro. Oncî qarşîye na zulmu de kî payvi..