Lütfen bekleyin..
Munzur Haber / Cinîya ke komelkîya Dêrsimî mezg û zerrîya xo de kiriştêne SARA

Cinîya ke komelkîya Dêrsimî mezg û zerrîya xo de kiriştêne SARA

10 Ocak 2017, 18:16

Endamê Konseyê Caardişî yê KCKyî Mustafa Karasuyî serrgêra Qirkerdişê Parîs de derheqê Sakîne Cansize de qisey kerde û wina va: “Sara bi serewedarkarî, karakterê xo yê înadin û vindetişê xo yê hepisxaneyî de zaf çî bi ma da musayîş”

9ê Çeleyê 2013 de welatê Parîsî yê Fransa de 3 cinîyê şorişger Sakîne Cansize, Fîdan Dogane û Leyla Şaylemeze ameybî qetilkerdiş û emser serrgêra 4. ya qirkerdişê 3 cinîyan o. 

Endamê Konseyê Caardişî yê KCKyî Mustafa Karasuyî nê 3 cinîyan ra derheqê Sakîne Cansize (Sara) de qisey kerd.  

Endamê Konseyê Caardişî yê KCKyî Karasuyî va ‘ez tim fikirîyaya, gelo xusûsîyetê serewedarkaro ke embaza Sara de estbî, kura ra ameybî’ û qiseykerdişê xo wina domna: “Nika ez resaya nê zanayîşî ke no xusûsîyet raştîya komelkî û tarîxî yê Dêrsimî ra yeno. Waştişê azadî yo gird, ancax bi komelkîyêka gird mumkun o. Embaza Sara nê komelkîya xo ya gird, heskerdişê xo yê Dêrsim û şarê kurdî ver wayîrê şexsîyetêko serewedarkar yo gird bîye.”

Cewab serkewtiş o

Karasuyî dewamê qiseykerdişê xo de dîyar kerd ke ‘ma mîyanê têkoşînê desan serran de bîyî şahidê bi deshezaran şehîdan, la mîyanê nînan de yê ke tewr zaf ma ser de tesîrêko travmatîk viraşt, şehadetê embazê Sara, Rojbîne û Ronahî bî’ û wina va: “Şehadetê embaza Sara yê winasî ma rê zaf giran ame. Îxtîmal estbî ke şer de an zî sewbîna hewa zî şehîd bikewo, la netîceyê cînayetêk de şehîtbîyayîşê aye tevgerê ma de nefretêko gird xelq kerd. Ma hîna zî hêrsê ci cuyenî û ma do heta ke eşqê azadî yê embaza Sara bireso serkewtişî, têkoşînê xo bidomnî. Xora cewabo tewr gird zî waştişê embaza Sara resnayîşê azadî yo.”

Embazêka finake

Karasuyî qiseykerdişê xo de bale ant xusûsîyetanê Sakîne Cansize ser û wina dewam kerd: “Embaza Sara wayîrê xusûsîyetanê Dêrsimî ke heta Qirkerdişê 1938î ti dewlete û îqtîdarî nas nêkerdo bîye û nê xusûsîyetan mezg û zerrîya xo de kiriştêne. Komelkîyîya Dêrsimî heta demo nizdî zî zirar nêdîbî. Embaza Sara embazêka zaf hîsine bîye. Embaza Sara de şexsîyetê serewedarkar û hîsgerî pîya estbî. Cok ra ge-ge reaksîyonê aye ya girdî bîyêne. Reaksîyon û hêrsê embaza Sara wextêko kilm de derbaz bîyêne. No eynî wextî de yeno manaya heskerdişê merdim, xoza û azadîyî. Embaza Sara mîyanê embazan de yê ke bi hawayo tewr gird nînan cuyayêne, aye embaze bîye. Cok ra embaza Sara embazêka finake bîye.

Karasuyî peynîya qiseykerdişê xo de va ‘şert û mercê hepisxaneyî xeylê zehmetin bîy’ û wina qedêna: “Mi şert û mercê tewr zehmetinan de şexsîyetê embaza Sara şinasna. Şexsîyetê ke sey embaza Sara tevgerê şorişgeran de cayê înan cîya yo. Senî ke şexsîyetê embaz Kemal Pîrî ma hemînan ser de tesîrêko gird viraşt, yê embaza Sara zî wina bî. Ma embaz Sara ra zaf çîyan musayî. Cok ra ganî heme cinîyê Kurdistanî vindetişê Sara yê hepisxane û koyan de xo rê finak bigirî. Ma soz danî ke do waştişê azadî yê embaza Sara qet nêqedîyo. Ma do heyfê şehadetê embaza Sara, bi azadkerdişê Kurdistan û Rojhelato Mîyanênî bigirî.” 

 

Kerdoxê suîkast û cînayetan dîyar î

Komîsyonê Cinîyan yê Kongreya Komelê Demokratîke (KCD) zî bi munasebetê serrgêra Qirkerdişê Parîsî îzehetêk nuştekî da. 

Îzehetî de ameyo vatiş ke ‘ma proseso ke tede suîkastî yenî cuyayîş ra derbaz benî’ û îzehet wina domîyayo: “Nê suîkastî zî nîşan danî ke dewletî senî nizdîyê kurdan benî. Yeno zanayîş ke kerdoxê her suîkast û cînayetî dîyar o. Reyna yeno zanayîş ke kerdoxê ti cînayet û suîkastî heta nika nêameyo dîyayîş. Kiştişê tetîkkeşî zî yeno manaya pawitişê dewlete yan zî dewletan. Mîyanê 2 seserrê peyênan de, aşma çeleyî de Ewropa de 2 cinîyî şorişgerî ameyî qetilkerdiş; Roza Luksemburge û Sakîne Cansize. Nê qirkerdişî nawnenî ma ke têkoşîn û problemê cinîyan, têkoşîn û problemê dinya yo. Cok ra ganî têkoşînêko bêmabên vera hêzê hegemonîk û netew dewletperweran de bêro nîşandayîş. Wexto ke merdim Roza ra heta Sakîne suîkast û qirkerdişî ke ameyî kerdiş ra ewnîyeno, vîneno ke lazimîya enternasyonalê cinîyan yê dinya esta.”

BERFÎN BAGDU / ANF / BEHDÎNAN 

Bu haber 692 kere okundu
  • Bu haberi paylaşın:
UYARI: Konuyla ilgisi bulunmayan, hakaret içeren cümleler veya imalar, inançlara saldırı, şiddete teşvik ve tamamı büyük harfle yazılan yorumlar onaylanmamaktadır.
Kategorisindeki Diğer Haberler
Daimi Doğan nusna: “Dersîm de îtîqat be zon jûvînî ra pêrabestî yê. Vajîm..