Dirveta rakerdî; SÊWAS

Ewro 23. serragerê qeklîama Sêwasî yo.Verîya 23 serran alewî serva şahîyê Pîr Sultan Abdalî şî Sêwas. La bi teşwîqê kesê ke bado bî şaredar û parlementerê AKP komkiştenekê gird û sîya viraziya. Dewleta tirk ke nîjadperweran kirêşt meydanan, a roj ganî bi ganî 3 kesan da ver adir û veşna. 

Komeleyê Pîr Sultan Abdalî, zey her serr, serra 1993î de zî, şahîyê Pîr Sultan Abdalî organîze kerdî. Kesê zey hozan Muhlîs Akarsu, şaîr Metîn Altiok, nûştox Asim Bezîrcî, hozan Nesîmî Çîmen û hozan Hesret Gultekîn, xeylê kesî serva (qandê-seweta) tewrbîyayişê (beşdarbîyayiş) şahî şî Sêwas.

Hadreyînê planê tarî

Quwetê tarî yê dewleta tirk verîya bi rojan verê şahî, kewtibî miyanê planê lîmin û tarî. Bi raya rojname, buroşor û aşkerekerdişan hadreyînê provokasyonan kerdî. Sebebê provakasyonan zî, şîyayişê nûştox Ezîz Nesînî bi. Çormeyê faşîst û nijadperestan îdîa kerdbî ke, Ezîz Nesîn'î kitabê xo de, heqaretê cenîya pêxember kerdo. La belê rastî de, ne kitabekê winayîn estbi û ne zî heqaretê ke behsê ci amey kerden. Vera heme tehdîtan, bi seyan kesan goş nêda tehdîtan û şî Sêwaz.

Sebeb zî no bi ke, şahî bi hetkarînê Wezîrê Kulturî û walîyê sûk ê zey kesê demokrat yenê silasnayen virazîyeno bi. Nayî ra pîya, partîya SHP ke reyê alewîyan girotbi, koalîsyonê hikumetî miyan de ca girotbi.Cok ra kesî îxtimal nêdayî êriş û provakasyonanê winayî.La belê nê pêrokîn omidî pûç vejîyayî. Bê ke zonayişê nê kesanê demokrat bibo dûştê înan hewildayen û planê qilêrîn û talokeyî amey hadrekerden. 

Badê nimazê îne qetlîam

Quwetanê tarî yê dewleta tirk destpa kar kerdî û komkiştişekê tarî viraştî. Êriş û bîyayişê bi gonîn, badê nimazê îne destpa kerd. Gonîheskerdoxan destpa êrişê cayê şahî kerdî û peycoy zî verê xo çarnayî Otelê Madimak ke hunermendî mîyan de mendê. Hunermendê ke otelî de  bî serva ke înan êrişan ra star bikerê, serokwezîr, yardimkarê serokwezîr û rayveranê bînan yê dewlet ra bi telefonî qisey kerdî. La belê a roj pêronan goşê xo kerdibî kerrî. Eno kerrîkerdiş bi sebebê veşnayişê 33 kesan. 

Şaredarî kiştoxan bimbarek kerdbi 

Ena komkişten verê çimanê herkesî de virazîya. O wext Hereketê Serbestîyê Kurd xo hona newe resnabi Sêwas. Cok ra na komkişten eynî wext de, vera sempatîzananê Hereketê Serbestîyê Kurd de zî virazîya. Şaredarê demê na komkişten Temel Karamollaoglu bi. No şaredar o gonîwerd bi vatişê "gazayê şima bimbarek bo" kiştoxî mubarek kerdibî. La belê çi heyfo, o keso prensîbê merdimîni pa çiniyê, bado bi parlementer.

Demîrel û Çîler

wayrê kiştoxan vejîyayî

Serokkomarê wextê komkiştenî Suleyman Demîrelî zî walî û midurê polîsan ra vatibi, şar û quwetanê asayişî meyarê verniyê pê.Serokwezîra demî Tansû Çîller a ke mesûla kiştişê bi des hezaran kurdan a zî, bi vatişanê “Çi rind ke çiyekê nêame şarê ma ser" wayîrê kiştoxan vejîyabî. Zaf kesê ke rol û gişta ci komkiştena Sêwasî  de estbî, peycoy amey terfîkerden, bî şaredar û parlementerê AKP. 

Na dawa ra mesûlê raştî qe nêamey cezakerden û dawa 13ê Adar 2012î de rîwalê ‘vîyartişê wextî’ gina war. La malbatan nayî qebûl nêkerd û tekoşînê ca ardişê edalet û rî bi rî ardişê kiştoxan ramenê. 

Tarîxê dewleta tirk bi seyan qetlîaman tî yo. Hona wexto ke dirbetê qetlîamê Dersim, Mereş, Gazî, Zîlan, Roboskî gonî danê sermîyanê dewlet îmze erzenê qetlîamanê newî. Cayo ke dewlet nê qetlîaman qebûl bikero, ef biwazo û zîyanan temîn bikero nika zî verê xo çarnayo hetê Kurdistan her roj qetlîamanê newî virazena. Hikûmeta AKP zey Otelê Madimak verîya çend aşman Cizîr de zî bodriman, keyeyan day ver adir û bi desan welatijan ganî bi ganî veşna. Dewrê AKP de zî bi fermanê Erdogan û sermîyananê hikûmet bi desan qetlîamê bi gonîn virazîyayî û hona zî virazîyenê.  

Herkesî silayînê meydanan kenime

Rêxistinê alewî xo kenê hadre ke 2ê Temûz 23. serragêra Qetlîama Sêwasî de protestoyê ver Otelê Madimakî de bîrê têhet. Alewîyan aşkere kerdî ke mesûlê qetlîam dewlet ra edalet nêpîteme û veng day pêrokîn çormeyanê demokratîk ke serva ca ardişê edalet vejerê meydanan. Serokê Federasyonê Alewî Bektaşî Bakî Duzgunî vist vîrî ke iyê dê ti wext qerarê ‘vîyartişê wextî’ qebûl nêkerê û herkesî 2ê Temûze de silayînê Sêwas kerd. 

Serokê Komeleya Kiltûr ya Pîr Sûltan Abdalî Ganî Kaplanî zî da zonayene ke Sêwas ne reynî ne zî peyenîn o û nîya va: “Ma dewlete ra edalet nêpîteme. Ganî ma nakê xo bi xo bibirnê, tersî bierzê û bivejime meydanan. Bado ke ma bi se hezaran berd Sêwas, bado ke ma Cizîr de bî Mehmet Tûnç, Sêwas de bî Hasret Gultekîn êşkeme edalet bivînime.” Kaplanî hayr ant qetlîamanê Cizîr, Sûr, Nisêbîn û cayanê bîn ser û va ganî civak dûştê qetlîamanê wehşî veng vejero. Kaplanî herkesî 2ê Temûze de silayînê Sêwasî kerd. 

‘Qetlê ci wacîp o’

Serokê Weqfa Haci Bektaşî Welî yê Kiltûrê Anadolu Haci Bektaşî Welî yê (HBVAKV) Ercan Geçmezî zî hayr ant rî bi rî ameyişê civakî ser û va qetlîamê Mereş, Çorûm û Sêwas dewlet ra bî xeber nêbî. Geçmezî zî vist vîrî ke cayo ke edalet çinyo ra edalet pîtenayiş (pawitene) şaş o û serva hesab persayiş hometî ra waşt ke 2ê Temûze de tewrê protesto û vîrarden bibê. 

Serokê Komeleyê Alewîyê Demokratîk yê Enqera Mûrat İşik’î zî da zonayene ke dûştê alewîyan fehmkerdişê ‘qetlê ci wacîp o’ Osmanijan ra na het rameno. İşikî hayr ant tekoşînê pîyayî yê şaran ser.  

Politika